Eleccións municipais 28 de maio - “Conversas no Parador” con Jorge Suárez de Ferrol en Común
Jorge Suárez avogou por "un centro para persoas maiores" na antiga Escola Politécnica de Serantes
O candidato de Ferrol en Común á Alcaldía de Ferrol, Jorge Suárez, situouse a favor de que as instalacións que acolleron a Escola Politécnica de Serantes, da Universidade dá Coruña (UDC), e que actualmente están sen uso, poidan acoller "un centro para persoas maiores", ao destacar que precisamente a falta de espazos para persoas da terceira idade é un dos problemas que está a sufrir esta cidade.
Así o dixo este martes Suárez, ex-alcalde de FeC entre 2015 e 2019, no ciclo "Conversas no Parador", que ven organizando o Club de Prensa de Ferrol no Parador de Turismo desta cidade. Na súa intervención, Jorge Suárez destacou que precisamente un dos problemas máis significativos desta cidade é "a perda de poboación", e, así, puxo sobre a mesa a necesidade de "tomar medidas contra este problema".
En primeiro lugar, apostou por "ofrecer oportunidades no ámbito laboral, para evitar que os mozos se teñan que marchar" e tamén instou a unha "aposta decidida polas infraestruturas", sobre todo no referente á conexión ferroviaria coa cidade da Coruña, "nuns tempos de acordo cos anos nos que vivimos".
Goberno de Coalición
O candidato de Ferrol en Común, que estivo acompañado dalgúns dos integrantes dos primeiros postos da lista electoral que el lidera para o 28M, tamén asegurou que "é mellor ter un goberno en minoría de esquerda que uno de maioría absoluta de dereitas". Con iso, estimou que, de ser necesario, "tería que darse unha negociación para poder entrar no goberno, xa que a experiencia deste catro anos non foi a esperada". Para Suárez, o goberno liderado polo socialista Ángel Mato "non cumpriu ningunha das súas promesas", ademais de incidir que o rexedor "estivo durante este catro anos metido nun bunker, mesmo sen chegar a recibir en todo este tempo ao presidente dalgunha entidade veciñal".
Sobre a prestación de servizos, Jorge Suárez detallou que desde o seu grupo se aposta "por ofrecer uns servizos públicos, apostando por empregados públicos", criticando que a Relación de Postos de Traballo do concello sexa "do ano 2000".
Por último, o militante de Esquerda Unida e candidato de Ferrol en Común criticou "os cinco millóns de euros" que ten previsto destinar o goberno municipal na rúa da Igrexa, ao estimar que "con ese diñeiro poderíase actuar noutras moitas zonas da cidade, sen destinar esta cantidade a unha soa obra".
